’جنت میں میرے پسندیدہ پھل نہیں اس لیے جانیکی کوشش نہیں کرتا‘، جاوید اختر متنازع بیان پر تنقید کی زد میں

پاکستان مخالف بھارتی رائٹر جاوید اختر کے ایک بار پھر دیے گئے متنازع بیان نے سوشل میڈیا صارفین کو آگ بگولہ کردیا۔

جاوید اختر اکثرو بیشتر پاکستان کے خلاف زہر اگلتے نظر آتے ہیں لیکن اس بار ان کے جنت سے متعلق دیے گئے بیان نے ایک نیا تنازع کھڑا کردیا ہے۔

سوشل میڈیا پر جاوید اختر کا ایک تقریب میں دیا گیا بیان وائرل ہے لیکن یہ واضح نہیں کہ یہ بیان کب اور کس تقریب کا ہے۔

ویڈیو بیان میں جاوید اختر نے جنت سے متعلق دیے گئے بیان میں کہا کہ’جنت میں میرے پسندیدہ پھل نہیں ہیں، کیلا اور، امرود جو میرے پسندیدہ پھل ہیں وہ جنت میں نہیں ہیں‘۔

جاوید اختر کے بیان پر تقریب کے شرکا نے زور زور سے ہنسنا شروع کردیا۔

اس کے بعد جاوید اختر نے مزید کہا کہ ’ہوسکتا ہے یہ پھل جہنم میں ہوں، اس لیے میں کبھی جنت جانے کی کوشش نہیں کرتا‘۔

جاوید اختر کے بیان کا کلپ سوشل میڈیا پر گردش کررہا ہے جس کے بعد سوشل میڈیا صارفین کی جانب سے بھارتی مصنف کو کڑی تنقید کا نشانہ بنایا جارہا ہے۔

ایک صارف نے جاوید اختر کے بیان پر تبصرہ کرتے ہوئے لکھا کہ ’ اس شخص نے 4 لوگوں کو ہنسانے کیلئے اپنی آخرت خراب کرلی۔واضح رہے کہ اس سے قبل ایک پروگرام میں گفتگو کرتے ہوئے جاوید اختر نے کہا تھا کہ ’پاکستانی کہتے ہیں کہ میں جہنم میں جاؤں گا اور بھارتی مجھے جہادی کہتے ہیں، کہتے ہیں پاکستان چلے جاؤ، اگر مجھے پاکستان اور جہنم میں سے کسی ایک کا انتخاب کرنا ہو تو میں جہنم کا انتخاب کروں گا‘۔