موسلادھار بارش:کے پی، گلگت اور کشمیر میں لینڈسلائیڈنگ سے ٹریفک متاثر ہونے کا خدشہ

موسلادھار بارش کے باعث خیبرپختونخوا کے پہاڑی علاقوں، گلگت بلتستان، کشمیر، مری اور گلیات میں لینڈ سلائیڈنگ کے باعث ٹریفک متاثر ہونے کا خطرہ ہے۔بارش کے باعث دیر، سوات، شانگلہ، مانسہرہ، کوہستان، ایبٹ آباد، مری، گلیات اور کشمیر کے برساتی ندی نالوں میں پانی کے بہاؤ میں اضافے کا بھی امکان ہے۔فلڈ فورکاسٹنگ ڈویژن کے مطابق دریائے سندھ میں گڈو اور سکھر بیراج پر نچلے درجے کا سیلاب ہے، باقی دریا اپنے اپنے ہیڈ ورکس پر معمول کے مطابق بہہ رہے ہیں۔دوسری جانب اسلام آباد میں مارگلہ کی پہاڑیوں سے نکلنے والے نالوں میں طغیانی آگئی، چک شہزاد اور پارک روڈ سے گزرنے والے برساتی نالوں میں شدید طغیانی ہے جس کے باعث ان علاقوں میں کئی کئی فٹ پانی جمع ہے جب کہ 6 سے7 نجی ہاؤسنگ سوسائٹیز متاثر ہونے کا خدشہ ہے۔ نیومل شرقی کے علاقے میں پانی گھروں میں داخل ہوگیا جب کہ مقامی افراد کا کہناہے کہ انتظامیہ کو بارہا آگاہ کیا لیکن ابھی تک کوئی ٹیم نہیں آئی۔موسلادھار بارش کے باعث اسلام آباد، راولپنڈی، گوجرانوالہ، لاہور اور سیالکوٹ کے نشیبی علاقے زیر آب آنے کاخدشہ ہے۔