صحرائے تھر میں خطرناک سانپ باہر نکل آئے، رواں ماہ 200 افرادکو ڈسنے کے واقعات

صحرائے تھر میں بارشوں کے بعد خطرناک سانپ بلوں سے باہر آنا شروع ہوگئے اور رواں ماہ اب تک 200 افراد کو ڈسنے کے واقعات پیش آئے ہیں۔

صحرائے تھر کے جنگلات میں سانپوں کی 10 سے زائد اقسام موجود ہیں جن میں نیورو ٹاکسک، اور مسکولو ٹاکسک سب سے خطرناک سانپ ہیں۔

بارشوں کے بعد سانپ بلوں سے کیوں نکل آتے ہیں؟

بارشوں کے بعد سانپوں کی افزائش کے دن شروع ہوتے ہیں جس کی وجہ سے انہیں بلوں سے باہر آنے کے ساتھ ساتھ اپنا زہر بھی جسم سے خارج کرنا ہوتا ہے۔

قدرتی طور پر سانپوں کی افزائش کا یہ مرحلہ ہر جاندار کے لیے خطرے کا باعث بنتا ہے کیونکہ سانپ کسی بھی جاندار کی آہٹ سن کر اپنے آپ کو بچانے کے لیے اسے ڈس لیتا ہے۔

محکمہ صحت کے مطابق تھرپارکر میں رواں ماہ کے دوران 200کے قریب افراد کو سانپوں نے ڈسا جنہیں علاج کیلئے اسپتالوں میں لایا گیا، ان میں چند افراد حیدرآباد منتقل کیے گئے تاہم ان مریضوں میں سے فقط ایک کی ہلاکت سامنے آئی۔ڈاکٹرز کے مطابق سانپ کے زہر کو زائل کرنے کے لیے اینٹی اسنیک وینم انجیکشن لگایا جاتا ہے اور یہ انجیکشن ایک مریض پر کم سے کم7 سے 10 کی تعداد میں استعمال کیا جاتا ہے۔

طبی ماہرین کی رائے

طبی ماہرین کا کہنا ہے کہ بارشوں کے بعد کے دورانیے میں ان سانپوں سمیت حشرات الارض سے محفوظ رہنے کے لیے صحرائی جنگل میں نکلنے کے دوران لانگ بوٹس اور لاٹھی کا استعمال کیا جائے رات کے وقت ہاتھ کی بتی کو استعمال میں لایا جائے تاکہ خود کو محفوظ رکھ سکیں۔