دنیا کی معمر ترین شخصیت 115 سالہ خاتون نے طویل زندگی کا آسان راز بتا دیا

دنیا کی معمر ترین شخصیت 115 سالہ ایتھل کیٹرہم کی نظر میں طویل زندگی کا راز لوگوں سے بحث نہ کرنا ہے۔

گزشتہ دنوں دنیا کی معمر ترین شخصیت کا اعزاز حاصل کرنے والی خاتون کے مطابق 'میں نے کبھی کسی سے بحث نہیں کی، میں سب کی بات سنتی ہوں مگر کرتی وہی ہوں جو کرنا چاہتی ہوں'۔

برطانیہ کے ایک نرسنگ ہوم میں رہائش پذیر ایتھل کیٹرہم کے مطابق یہ ان کی طویل زندگی کا راز ہے۔

ان کی پیدائش 21 اگست 1909 کو جنوبی انگلینڈ کے ایک گاؤں Shipton Bellinger میں ہوئی تھی۔8 بہن بھائیوں میں وہ 7 ویں نمبر پر تھیں اور سیاحت ان کا پسندیدہ ترین مشغلہ تھا۔

1927 میں 18 سال کی عمر میں انہوں نے برصغیر کے سفر کا آغاز کیا اور ایک برطانوی خاندان کے ہاں 3 سال تک کام بھی کیا، پھر انگلینڈ واپس چلی گئیں۔

ان کی اپنے شوہر نورمن سے ملاقات 1931 میں ہوئی۔

برطانوی فوج سے تعلق رکھنے والے نورمن ہانگ کانگ اور جبرالٹر میں تعینات رہے۔

ان کے شوہر کا انتقال 1976 میں ہوا اور ان کی 2 بیٹیاں تھیں جن کی پرورش برطانیہ میں کی گئی۔

Camberley کے کیئر ہوم میں رہائش پذیر خاتون کی جانب سے کیک کاٹنے کی تصاویر سوشل میڈیا پر جاری کی گئی تھیں جن میں انہوں نے سر پر 115 نمبر کا تاج پہنا ہوا تھا۔

کیئر ہوم کی فیس بک پوسٹ میں خاتون کو دنیا کی معمر ترین شخصیت بننے پر مبارکباد دی گئی۔

خیال رہے کہ برازیل سے تعلق رکھنے والی 116 سالہ اناہ کانابرو لیوکاس کا انتقال 30 اپریل کو ہوا تھا جس کے بعد ایتھل کیٹرہم دنیا کی معمر ترین شخصیت بن گئیں۔

گنیز ورلڈ ریکارڈز کے مطابق دنیا میں سب سے زیادہ عمر کا ریکارڈ فرانس کی Jeanne Calment کے پاس ہے، جو 1997 میں 122 سال کی عمر میں انتقال کر گئی تھیں۔

ان کا کہنا تھا کہ چاکلیٹ، تمباکو نوشی اور زندگی میں مزاح ان کی لمبی زندگی کے راز ہیں۔